Thukuru ya Acoki a MŨGĨ

Ciana cia thukuru ya Acoki a MŨGĨ, Mũtũngũrũ, Kenya

Ciana cia Thukuru ya Acoki a MŨGĨ, Mũtũngũrũ, Kenya

Mũtabarĩra wa Thukuru ya Acoki a Mũng'eng'ano wa Ũrĩmi wa Gũtũũrithia (MŨGĨ) ũheaga ciana cia thukuru cia itũũra rĩa Mũtũngũrũ, thĩiniĩ wa Gatũndũ, Kenya, mweke wa gũthoma wega. Mũtabarĩra ũyũ wa thukuru ya acoki nĩ ũheaga ciana icio mweke wa gũkorwo na mabuku maingĩ nĩ guo ithome maũndũ maingĩ, igayane maũgĩ marĩa me mabukuinĩ macio, na igĩe na mĩtugo ya gũthoomaga kaingĩ nĩ guo ihote gũgatũũrania wega na andũ a kuma kũndũ na kũndũ.

Thukuru ya acoki a MŨGĨ nĩ mũtabarĩra wa Mũng'eng'ano wa Ũrĩmi wa Gũtũũrithia (MŨGĨ) ũrĩa ũtabanagĩrio rungu rwa Kĩambithia kĩa Wĩteithia na Wĩkũria wa Mumo. Kĩambithia kĩa Wĩteithia na Wĩkũria wa Mumo nĩ kĩmwe harĩ ikũmi iria arĩ cio itugĩ cia koine cia kĩambĩro kĩa wĩkũria. Thukuru ĩno ya acoki a MŨGĨ yambĩrĩirio mwaka wa 2009.

Thukuru ya acoki a MŨGĨ nĩ ĩhetwo mabuku ma ciana nĩ thukuru igĩrĩ cia Laramie, Wyoming: Snowy Range Academy, na Spring Creek Elementary School. Bengi ya First-Interstate Bank o ya kũu Laramie, na yo nĩ yateithĩrĩirie na mbeca cia gũtũma mabuku mamwe Kenya mweriinĩ wa Kanyua Hũngũ, 2009. Mabuku marĩa matigarire nĩ matwarĩirwo ciana Mũtũngũrũ mweriinĩ wa Gatumu 2010. Ciana cia thukuru ya acoki a MŨGĨ rĩu nĩ ikombagĩrwo mabuku maya igathomera mĩciĩinĩ ya cio. Gũkomberwo mabuku maya nĩ kũhotithĩtie ciana icio gũthoma mabuku maingĩ ma ciana marĩa na mo marateithĩrĩria gũkũria ciana icio mathomoinĩ.

Mweriinĩ wa Gatumu 2010, thukuru ya acoki a MŨGĨ nĩ yaheire ciana 90 iria yathomithĩtie 2009-2010 marũa ma wĩrutanĩria nĩ ũndũ wa gũthoma wega.

Kuma mweri wa Mũgetho 2011, thukuru ya acoki a MŨGĨ nĩ yambĩrĩirie mũtabarĩra wa gũteng'eria mathomo ma mathabu na Kĩngeretha harĩ ciana cia irathi cia 7 na 8 nĩ guo ihote kũhĩtũkaga wega kĩgerio gĩa Kenya Certificate of Primary Education (KCPE). Kũhĩtũka kĩgerio gĩkĩ wega na kuo nĩ kũrĩhotithagia ciana icio kwoyagwo mathukuru mega ma ngathĩ, na kwoguo ikahota kwambatĩria mathomo ma cio. Thukuru ya acoki a MŨGĨ ĩ na ciana 150 cia irathi 1-8 na arutani atatũ.

Thukuru ya Acoki a MŨGĨ Mohoroinĩ
UW Freshman Synergy Class to Raise Funds for Kenyan Project